La motivaziun da crear quella collecziun da recepts saja stada gronda, uschia Leonie Liesch, la manadra da l’uniun Grischun Viva. Ellas na sajan numnadamain betg vegnidas dumandadas activamain da crear quel cudeschet. Quella idea saja vegnida ord l'atgna cuschina.
Sch'ins vul raquintar l’istorgia da 500 onns Grischun, lura na dastga il mangiar e la culinarica dal Grischun betg mancar.
L’archiv dal chantun saja stà ina funtauna ferma quai che pertutga la retschertga dals recepts. In'ulteriura inspiraziun hajan Leonie Liesch e ses team chattà el archiv da cultura da dunnas. E betg sco davos han ellas ed els era tschiff posta cun divers recepts da chasadas privatas. Quai haja fatg grond plaschair.
600 cudeschets da recepts davent entaifer paucs dis
Il cudeschet che purtretescha total 10 recepts che tanschan fin 500 onns enavos, è per il mument gia davent. L’interess era para gronds. Bunamain 600 cudeschets han ins mess a disposiziun al public. A partir da la mez settember duess ina nova chargia arrivar. Quella giada è la furniziun in zic pli gronda, totalmain 1’500 tocs. Il cudeschet datti dentant er online per chargiar giu gratuitamain.