Dà fieu la corda da fieu per metter en pe ina purschida da tgira per uffants en Val Schons e Valragn ha la scola, sco Catrina Salis, la presidenta dal cussegl da scola dal consorzi da scola Val Schons di. Tar las vischnancas saja l'idea fruntada sin ureglias avertas.
Las set vischnancas participantas Runtgaglia, Ziràn-Reschen, Muntogna da Schons, Andeer, Farera, Valragn e Sufers han dà lur consentiment per la canorta Schons – Valragn. L'emprim onn vegn il deficit a muntar a 35'000 francs. Radund la mesadad da quel sto la vischnanca dad Andeer purtar. Suenter trais onns duess la canorta Schons sa purtar finanzialmain sezza.
Cun Andeer ha la canorta chattà il lieu ideal – situà central per tut ils vitgs. Cun l'anteriura chasa da scola eran era las localitads quasi avant maun. Gist perquai che Andeer porschia varsaquantas plazzas da lavur per exempel en il center da tgira Glienda, il bogn da cura u en ils differents menaschis gastronomics saja la vischnanca s'engaschada per il post Andeer. En quels secturs da lavur pudess il basegn per la tgira d’uffants esser evidenta. La radunanza communala dad Andeer ha gia avant duas emnas approvà in credit da 480'000 francs per lavurs da sanaziun e restructuraziun da l'anteriura chasa da scola.
«Pro junior Grischun», l'anteriura «Pro juventute» vegn a manar la canorta che porscha l'entschatta plaz per 12 uffants. Tar las lavurs da restructuraziun vegn gia uss previs in schlargiament sin plaz per 24 uffants. La canorta che porscha ultra da la tgira per uffants pitschens era structuras dal di ed ina purschida da tgira cumplementara a la scola avra las portas l'entschatta avust.