Suenter la demissiun da Simona Demarmels, che na po betg pli esser activa en la suprastanza pervia da sia nova funcziun tar la Lia Rumantscha, ed il congedi prolungà da la co-presidenta Gierina Michael è la direcziun da l’uniun indeblida. Spezialmain quitads fa la mancanza da represchentants dal Surmeir.
Tenor ils statuts da l’URGC duain mintgamai duas persunas da la Sutselva (Trin fin Schons) e dal Surmeir (Surses e Val d’Alvra) far part da la suprastanza. Actualmain manca però ina represchentanza dal Surmeir. Ultra da quai sa retira il cassier Flavio Guetg da Savognin – sia lavur vegn en il futur surpigliada dad ina firma externa. Sco che Guetg ha declerà en in’intervista cun RTR, vegn discutà da publitgar in'annunzia per chattar dus novs commembers da la suprastanza per la regiun Surmeir. A medem temp sa tschentan dumondas davart la structura da l’uniun.
Las regiuns Sutselva e Surmeir èn fitg differentas – forsa dovri midadas a lunga vista
Ils proxims mais èn impurtants per l’Uniun Rumantscha Grischun Central. L’organisaziun sto cumplettar sia suprastanza ed eventualmain discutar midadas structuralas. La proxima radunanza generala è planisada il matg da quest onn.
Posiziun da la Lia Rumantscha
La Lia Rumantscha accepta questa situaziun ma suttastritga ch’i fiss impurtant ch’ils Surmirans fissan represchentads en suprastanza da l’Uniun Rumantscha Grischun Central (URGC).
Markus Solinger, il secretari general da la Lia Rumantscha ha confermà che la suprastanza da la URGC consistia actualmain mo da Sutsilvans, però sajan ils Surmirans represchentads cun la Surmirana Simona Demarmels, che lavura per la Lia Rumantscha, ed è stada co-presidenta da la URGC. Era Patric Vincenz haja represchentà la URGC en la suprastanza da la Lia Rumantscha.
Nus na vesain betg ch’i saja in impediment per l’URGC da cuntinuar sia lavur cun questa constellaziun.
La URGC gioghia ina rolla impurtanta per mantegnair la cuminanza rumantscha e represchentia il sutsilvan e surmiran, omadus idioms che han paucas persunas che discurran els. Els vesian quant central ch’ina tala uniun saja, per exempel er en la Surselva u en l’Engiadina, nua che las uniuns linguisticas hajan in ferm sustegn.
La Lia Rumantscha saja pronta da sustegnair la URGC sche quai vegn dumandà, sco gia fatg en cas similars cun autras uniuns.
Sche l’URGC dumondass per agid, nus fissan senz’auter pronts da sustegnair, sco nus avain gia fatg per la Giuventetgna Rumantscha GIURU. Per exempel, jau ed in promotur regiunal avain persunalmain telefonà per chattar commembers per la suprastanza.
A lunga vista fissi necessari da repensar las structuras da las uniuns rumantschas, perquai ch’ellas funcziunan cun voluntaris e quai chaschuna savens difficultads per chattar persunas per la suprastanza, ha ditg Markus Solinger. Forsa stuain nus crear in sistem pli modern, adattà a la realitad dad oz.»
Forsa stuain nus crear in sistem pli modern, adattà a la realitad dad oz.
La dumonda schebain commembers pon daventar part directamain da la Lia Rumantscha senza l’intermediaziun da las uniuns regiunalas duai era vegnir discussiunada. Tenor ils statuts actuals na po nagin daventar commember directamain da la Lia Rumantscha. Ma èsi anc adattà per il temp dad oz? Jau pens che questa discussiun saja necessaria.
Jau pens che questa discussiun saja necessaria.
