La Lia Rumantscha engascha Simona Demarmels sco nova promotura regiunala per il Grischun Central. Quai scriva la Lia Rumantscha.
Simona Demarmels è scolasta primara ed experta da cumportament da chauns. Anc enfin la fin da l'onn 2024 è ella copresidenta da l'URGC, l'Uniun Rumantscha Grischun Central. Ella instruescha dapi intgins onns curs da rumantsch surmirans fisics e virtuals da la Lia Rumantscha. Simona Demarmels sustegna Carmen Caspar en la promoziun regiunala dal Surmeir.
Simona Demarmels cumplettescha la squadra da la Lia Rumantscha a partir dal zercladur 2024 cun in pensum da 40%.