Suenter ina planisaziun intensiva vegnian realisads ils emprims projects parzials da l’Ela Genusswelt, scriva l’uniun en ina communicaziun. Dals 3,7 milliuns francs che vegnan investids en il perimeter dal Parc Ela derivan 2,5 milliuns da contribuziuns da la Confederaziun e dal chantun.
Mazlareia Ela avra a temp – gist avant la chatscha
L’emprim project è la Mazlareia Ela a Cunter. La chasa da maz è vegnida surdada a la medema societad cooperativa il mars. Suenter la renovaziun che cumenza la mesadad da matg, duai il manaschi avrir la fin d’avust, gist ad uras per la stagiun da chatscha. Ina butia cun products regiunals è previsa per la stagiun d’enviern.
Ulteriurs projects cun mostaria e chascharia
La nova uniun «Bergobst Ela» vegn a manar ina mostaria per clients a Cunter davent da l’atun e porscher servetschs da pumicultura. Sin il bain Cadras a Salouf vegn endrizzà in local da producziun per jogurt e tschigrun ord latg indigen. Plinavant planisescha la Corporaziun d’alp Alvagni da construir ina chascharia d’alp biologica.
Project cuzza fin il 2030
L’idea dal project da svilup regiunal Ela Genusswelt è da mantegnair la valur en la regiun e da rinforzar la rait da producziun e da commerzialisaziun da products regiunals. La realisaziun cuzza fin l’onn 2030. La finamira a lunga vista è ch’ils projects funcziuneschan independentamain.
