125 bains purils datti en il Parc Ela. Radund trais quarts dal latg da las 1'000 vatgas e da la charn dals 3'900 vadels e biestga grossa bandunan il parc. I dettia dentant anc potenzial d’augmentar la creaziun da valur. A questa conclusiun vegn in studi da l’onn 2019 da la Scol’auta spezialisada dal Grischun.
Set projects parzials
Sco basa da quella realitad vuless il project svilup regiunal (PSR/PRE) che sa numna «rait per products regiunals Parc Ela» promover ils products regiunals e la vendita da quels. Ils set projects èn descrits en la box giusut.
Purs e gastronoms en la medema bartga
Durant ina fasa da preparaziun ils davos dus onns han differentas gruppas da lavur sviluppà in sboz cun novas ideas da fatschenta. Las gruppas consistan da represchentantas e represchentants da l’agricultura, da l’hotellaria, da la gastronomia e d’ulteriuras organisaziuns localas dal svilup regiunal da Surses e da la Regiun Alvra.
Emprims pass èn fatgs
Ussa ha cumenzà l’etappa da basa per set projects parzials, ha ditg Heidrun Moschitz, ch’è manadra da projects per projects regiunals ed in’economia persistenta en il Parc Ela. Proximamain ins vegnia en set butias dal Parc Ela ad installar curunas cun products regiunals e suenter analisar quant dumandada che questa purschida saja. In pass enavant ins saja era gia a Salouf. Là saja gia profilà in center per elavurar products da latg. Quest center duess daventar accessibel per tut ils purs dal Parc Ela.
Ils proxims pass
«Fin la fin da l’onn vegnin nus a far in business plan per mintga project parzial che declera tut ils detagls da mintga project e tgi che sa participescha e cun tge entradas ch’igl è da quintar», di Heidrun Moschitz. Quest plan da fatschenta mussia era che a partir dal setavel onn stoppia mintga project parzial sa purtar sez. Il chantun stoppia suenter anc analisar ils projects da PSR/PRE. Moschitz quinta ch’ins possia en il meglier cas cumenzar a realisar ils projects l’emprim quartal da l’auter onn.
