Il sistem Quadrin porscha ina moda da construir or da lain flexibla che s'adattescha individualmain als giavischs da la clientella. El metta l'accent sin auta qualitad, material regiunal ed architectura moderna. Per pudair realisar projects pli gronds e pli svelt, duess l’entir process da construcziun vegnir digitalisà. Il nov project «Smartflow System» collia la planisaziun e la producziun digitala per spargnar temp e resursas. La finamira è da render la moda da construir pli persistenta e pli adattada per l'avegnir – e d'inspirar autras interpresas da la branscha.
Digitalisar ils Quadrins e la crana
Sco quai che Enrico Uffer, il manader da fatschenta da la Uffer SA da Savognin, ha ditg sin dumonda, giaja en il project per la davosa miglia. Uschia ins vegnia tranter auter a testar egliers che dattan infurmaziuns als lavurants sin in display. Era duess tocca da construir survegnir in chip u in QR-code, per uschia vegnir chattà pli spert. Las ideas giajan uschè lunsch ch’ins possia perfin digitalisar la lavur cun la crana, uschia Uffer.
Chantun sustegna digitalisaziun
Quest schaner ha la regenza grischuna concedì ina contribuziun chantunala per il project digital en il sectur da la construcziun d'elements da lain. La regenza ha concedì ina contribuziun chantunala da maximalmain 666'131 francs a la firma Quadrin SA per il project. Ella ha deliberà questa contribuziun en il rom da la Lescha davart la promoziun da la transfurmaziun digitala en il Grischun. Ils custs d'investiziun importan tut en tut circa 1,61 milliuns francs.
Divers auters projects profitan
Fin ussa ha il Grischun gia sustegnì 29 projects che promovan la digitalisaziun. Quai è da leger sin la pagina d’internet da l’uniun GRdigital. Ella surpiglia per incumbensa dal chantun incumbensas impurtantas tar la realisaziun da la lescha per promover la transfurmaziun digitala en il Grischun.
Or da l'archiv
Ils quaderins da la firma a Savognin èn tranter auter vegnids dovrads per fugitivas e fugitivs da l'Ucraina a Cuira.