La gronda part da las participantas e participants fa in curs d’ina emna. En tut instrueschan sis scolastas e scolasts. Quai èn Ursina Guldemond-Netzer, Mèn Candreia, Sarah Cadotsch, Simona Demarmels, Ursina Guldemond-Netzer, Bartolome Tscharner e Linard Candreia. I dat curs da tut ils divers nivels, sco era curs da conversaziun. Cun 11 persunas è il curs da repetiziun e conversaziun I visità il meglier.
Tge emprendan las scolaras e scolars en il curs?
Nus avain visità il curs da Ursina Guldemond-Netzer en la scola Barnagn a Savognin. En quest mument eran els vid exercitar la conjugaziun dals verbs. Che la scolasta Guldemond-Netzer fa quest curs è in zic spezial cunquai ch'ella viva atgnamain ad Amsterdam en l'Ollanda. Ella emprova dentant da discurrer mintga di cun ses uffants rumantsch. La davosa giada ha ella instruì ils onns 90 curs rumantschs, ma emprova dad adina star sin il current cun il svilup da la lingua, era sch'ella n'abita betg pli en Svizra.
Sco la scolasta Simona Demarmels ha ditg, sajan las participantas e participants stads fitg motivads quest'emna. La glieud vegnia da dapertut. Sper il curs al lieu, dettia er curs online da rumantsch, là saja natiralmain pli simpel da sa participar, ha Demarmels aschuntà, ma al lieu possian ins er sper il curs baterlar in zic dapli.
Raschuns che las persunas en il curs vulan emprender rumantsch datti pliras. Ils ins chattan la lingua rumantscha fitg bella, auters vulan s’integrar pli fitg cura ch'igl èn qua en las vacanzas ed anc auters han in partenari rumantsch ed emprendan or da quest motiv rumantsch.
