Far naiv tecnica, quai ch’è la correcta furma per la naiv artifiziala, n’è betg sulet impurtant per il sport da ski alpin, er per il sport da passlung èsi impurtant che las loipas èn prontas sin ils firads da Nadal. Perquai vegni fatg naiv tecnica per preparar la loipa da la Cadi.
L’entschatta da l’emna èn las temperaturas stadas fitg bassas, quai che munta idealas cundiziuns per far naiv e perquai hajan ins pudì producir blera naiv, declera il responsabel Simon Cathomen. Per els dal CMF Cadi, ch’ha in contract da prestaziun cun Nordic Surselva per far la loipa, saja impurtant d’avair en tut ils lieus naiv. Uschia ch'els produceschian naiv dasper Fontanivas era a Disla ed a Trun. Qua sajan las maschinas almain in di en funcziun e quai bastia, di Simon Cathomen.
Far naiv per la loipa Cadi
-
Bild 1 von 4Legenda: Il chanun da naiv producescha il pli effizient tar temperaturas bassas. RTR, Gionduri Maissen -
Bild 2 von 4Legenda: Simon Cathomen, il responsabel, vi da far las controllas a Fontanivas. RTR, Gionduri Maissen
-
Bild 3 von 4Legenda: Simon Cathomen, il responsabel, vi da far las controllas a Fontanivas. RTR, Gionduri Maissen
-
Bild 4 von 4Legenda: Il mument mussa il termometer temperaturas da minus 12. RTR, Gionduri Maissen
Era hajan els decis da betg far naiv cura che las temperaturas n’èn betg sut minus 5 grads. Far naiv pudessan ins cun temperaturas da minus 2, ma pli fraid e meglier. Ils ultims onns haja la loipa sulet pudì vegnir fatga grazia a la naiv tecnica, ma per pudair far l’entira loipa dovria anc enfin Nadal il sustegn da surengiu, di Simon Cathomen, senza quel na giaja quai betg.
Piunier da far naiv era Savognin e Leo Jeker
Ils egls da Leo Jeker glischan cura ch'el raquinta da la naiv tecnica. Avant 44 onns, il december 1978, han las pendicularas da Savognin producì per l'emprima giada naiv cun chanuns. Da quellas uras era quai il pli grond indriz d'ennavar en l'Europa. Mancanza da naiv haja intimà el da chattar soluziuns. Ina fiss stada ina pendiculara gronda per transportar ils skiunz e las skiunzas en in'autezza cun segirtad da naiv, in'autra apunto la producziun da naiv tecnica.
La naiv producida a l'entschatta saja stada tut in'autra che ussa – ma cun l'experientscha al lieu saja er la naiv vegnida meglra. Il factur carstgaun saja dentant er ussa cun chanuns computerisads da gronda impurtanza. E per garantir bunas cundiziuns da pista saja sper il producir naiv er impurtant che la naiv vegnia scumpartida ed elavurada bain.