Fitg precara saja la situaziun finanziala stada l'onn passà, declera Markus Niederdorfer ch'è dapi in onn e mez en uffizi sco president communal da Farera. I saja stà uschè stretg ch'ins avess prest betg pudì pajar las pajas da persunal.
Schegea ch'ins pudess d'ordaifer avair l'impressiun che la vischnanca saja ritga, n'haja Farera betg mess d'in maun reservas ils ultims onns – perquai mancan uss ils daners, declera Niederdorfer. Er in augment dal pe da taglia – ch'è tar 70% da la taglia chantunala simpla – haja tar 81 abitants ed abitantas be in fitg pitschen effect. L'onn passà ha il quint mussà tar entradas totalas da 3,8 milliuns francs in minus da bun 360'000 francs.
Tuttina nagina fusiun
Per Markus Niederdorfer n'è ina fusiun en direcziun da Val Schons u Avras nagin'opziun. La finamaira saja da restar independent ed autonom e betg da daventar la vatga da latg. Il medem mument saja dentant era cler ch'ins stoppia optimar il quint communal e considerar bain mintga post nua ch'ins possia generar daners e gudogn e sminuir las expensas.
