La proposta da la suprastanza communala è ansesez stada in'autra: separar il campadi a l'albiert Generoso ed l'ustria Edelweiss. En plirs votums da la populaziun è dentant vegnì rinfatschà a la suprastanza, ch'ella n'haja betg fatg sia lavur: Gia l'october a l'onn passa haja la suprastanza survegnì l'incumbensa da la populaziun d'elavurar in concept general per la reorganisaziun. Il tenor: la suprastanza n'haja betg ademplì quell'incumbensa a moda e maniera cuntentaivla.
Sin basa dad ina proposta or da la populaziun han las 37 votantas e votants preschents surdà a la suprastanza communala l'incumbensa d'elavurar in concept da gestiun general per ina reorganisaziun dal Magic Wood. I va per l'albiert Generoso, l'ustaria Edelweiss ed il campadi en Val Farera. L'incumbensa concreta: Entaifer ils proxims dus onns dess la suprastanza elavurar enzemen cun ina cumissiun in concept general per la reorganisaziun dal Magic Wood. Er il contract cun il fittadin actual Thomas Saluz che scada la fin da l'onn duai vegnir prolungà fin la fin dal 2026. Sper l'infrastructura turistica dess tranter auter la grondezza futura dal campadi vegnir examinada. Mintg'onn attira il territori da bouldrar passa dieschmilli persunas. En in punct paran ils da Farera ad esser perina: els na vulan teg anc dapli glieud en il guaud magic - l'infrastrucutra è numnadamain gia uss als cunfins.
