-
Bild 1 von 2Legenda: Giovanni Netzer ha anc ina giada preschentà ils plans, co e nua che la chasa duai vegnir spustada. Sche tut va bain duajan las lavurs cumenzar l'entschatta october. RTR, Pietro Jacomet -
Bild 2 von 2Legenda: Cun spustar la Chasa Alva (la chasa a l'ur da la via cun barcuns verds) vegniss la via stretga per trais meters pli lada. RTR, Pietro Jacomet
La Fundaziun Origen ha ensemen 3,7 milliuns francs per lur project «Salvar Mulegns». Quels daners èn per gronda part vegnids miss a disposiziun da fauturs privats. Ussa mancan anc 1,9 milliuns francs per che la Fundaziun Origen cuntanscha la summa avisada da 5,6 milliuns.
Co vai vinavant?
Per cumprar e dislocar la Chasa Alva fissan ils daners gia avant maun. Avant ch'ins possia dentant cumenzar cun las lavurs da spustament, dovra la Fundaziun Origen anc duas lubientschas:
I dovra ina decisiun dal cumin da Surses, areguard la vendita da las parcellas. Ultra da quai dovri anc il consentiment definitiv da la regenza grischuna.
Giovanni Netzer è optimistic che quellas votaziuns na vegnan dentant betg ad esser in crap da stgarpitsch per il project. Medemamain quinta el fermamain che la Fundaziun Origen vegnia tochen la fin da quest onn era anc ensemen cun ils 1,9 milliuns che mancan. En emprima lingia spetgan els anc sin respostas da fundaziuns che sustegna projects da cultura.
La finamira sportiva è dentant da gia pudair cumenzar l'october 2019 cun las lavurs da preparaziun per il spustament da la Chasa Alva. Quellas vegnan a durar bain in onn, fin che la chasa po alura entaifer sulet 1 di vegnir spustada dal vegl al nov lieu.
Ord l'archiv dal Telesguard
RR novitads 17:00