-
Bild 1 von 3. La visualisaziun da la nov trassé da la via ed il profil da la Chas'alva suenter l'adattaziun. ord la perspectiva vest. Bildquelle: mad / Uffizi da construcziun bassa / biro d'architectura Clavuot.
-
Bild 2 von 3. La via e la Chas'alva suenter l'adattaziun ord la perspectiva ost. Ils peduns vegnissan da nov manads tranter la Chas'alva ed il Ragn da Faller. Bildquelle: mad / Uffizi da construcziun bassa / biro d'architectura Clavuot.
-
Bild 3 von 3. Il plan da la situaziun avant e suenter (cotschen) l'adattaziun da la via e da la Chas'alva en il center da Mulegns. Bildquelle: mad / Uffizi da construcziun bassa / biro d'architectura Clavuot.
Tenor l'Uffizi da construcziun bassa saja quai ina schliaziun cun in concept stabil che respectia il center istoric da Mulegns. Il medem mument vegnia la via pli survesaivla ed i possia vegnir garantì dapli segirtad. Sin il trassé adattà da la via pudessan autos da persunas cruschar. Per ils peduns e las pedunas èsi prevì da stgaffir ina nova colliaziun segira che passa tranter la Chas'alva ed il Ragn da Faller. Ultra da quai è il profil pervì da la Chas'alva aut avunda per camiuns e bus uschia ch'i na duess betg dar pli sdrivladas cun ils edifizis.
Gia pliras emprovas da meglierar la situaziun
L'intenziun d'eliminar la stretga sin la via dal Güglia exista gia dapi 20 onns. Uschia hai er gia dà plirs projects ch'èn però adina vegnids refusads. Il project actual è il resultat d'ina concurrenza da studi tranter quatter biros d'architectura. Quai cun la finamira da chattar la meglra schliaziun pussaivla tant per il traffic, per ils peduns ed abitants sco er per il center istoric.
Fin ils 18 da december è il project planisà cun tut ils rapports er dals auters quatter projects exponì tar l'administraziun communala dal Surses. Ultra da quai èn ils quatter studis ed il project victur exponids publicamain en la Chasa cotschna a Mulegns dals 20 fin ils 23 da november. Sche tut va sco previs, po l'Uffizi da construcziun bassa cumenzar cun las lavurs da construcziun la stad 2019.
RR novitads 11:00