Il levgiament ed il plaschair èn gronds tar las persunas responsablas dal Parc Ela Trek. Sis onns è vegnì lavurà vi dal project per porscher ina senda cun pliras etappas. Per las dus co-manadras da l'uniun Parc Ela Trek Irene Schuoler e Nicole Kayser n'è la lavur dentant betg anc a fin. I saja in project dinamic e quai munta che las etappas ed ils purschiders possian midar adina puspe. Gion-Franzestg Schaniel, il president da la corporaziun Alp d'Err, è cuntent che lur alp è lieu d'etappa – uschia sappia er vegnir generà dapli svieuta e la fin finala gudogn. In gudogn per il turissem saja il trec en mintga cas, è la directura da turissem Tanja Amacher persvadida ed or da l'optica dal Parc Ela, uschia Veronika Widmann, saja la senda da viandar, il Trek in bun mussament per la chadaina da valurisaziun.
Retard d'in onn
Gugent avess ins avert gia la stad passada il Parc Ela Trek. La fasa da scleriment cun ils differents uffizis, survegnir tut las lubientschas e la fin finala er il curt temp da construcziun pussaivel sin in'alp, sajan ils motivs per il retard, uschia Irene Schuler la manadra dal project. Per pudair communitgar tut en ina giada e per avrir l'entir traject cun in event era l'avertura vegnida spustada sin la stad 2023.
