La fin dal 2021 aveva l'uniun dal Parc Ela decis ch'il pli grond parc da la natira da la Svizra duai vegnir manà davent da l'avrigl 2022 da las trais dunnas Veronika Widmann, Regina Lenz e Judith Burri. Widmann, ch’è vegnida l’onn passà en il parc, vegn uss a surpigliar sco unica la direcziun. Regina Lenz sa concentrescha en futur sin la part da manadra da projects e Judith Burri banduna suenter 12 onns il Parc Ela e s'orientescha da nov.
Model da trais betg cuntentaivel
Patrizia Zanini, la presidenta da l’uniun Parc Ela, ha ditg sin dumonda ch’il model da trais na saja betg stà cuntentaivel, betg per il team da direcziun e betg per l’uniun. Cun turnar tar in model classic da direcziun possia vegnir augmentada l'effizienza da decisiun e l'abilitad d'agir, uschia Zanini.
Veronika Widmann è dal Tirol dal Sid ed è stada avant che vegnir tar il Parc Ela vicedirectura da la rait da regiuns da protecziun alpinas Alparc.
