Linard Candreia scriva e chamina gugent. Ed ussa ch'el ha sco pensiunà temp è stà cler ch'el cumbinescha quests dus plaschairs. La trilogia da ses viadis n'è dentant nagin cudesch da viandar, percunter cudeschs cun istorgias d'inscunters ed impressiuns persunalas.
Da Laufen en il chantun Basilea-Champagna enfin a Stierva – quai è stada la ruta da viandar l'onn passà da Linard Candreia. Silsuenter è el chaminà da Basilea a Genevra e da Basilea a Como. Sias impressiuns e ses inscunters spontans ha el mess sin palpiri ed illustrà cun bleras fotografias. Ils cudeschets na sajan nagina lavur litterara u schurnalistica, raquinta il scolast da gimnasi pensiunà. Uschia ha el edì ils cudeschs en atgna reschia – er per esser liber cun format, furma e cuntegn.
«Jau stoss chaminar»
Cun esser pensiunà e cun esser da buna sanadad haja el ils davos onns badà, ch'el dovria il chaminar. Uschia saja er stà cler per el ch'el cumbineschia il viandar cun il scriver. Dentant betg mo impressiuns dal viandar, ma er fatgs ch'el retschertgia avant u suenter da las singulas viandadas. Il viandar funcziuna adina tenor il medem schema: La saira turna el a chasa a Laufen per esser pli liber e pudair far las etappas cura ch'el vul. Sin ses viadis haja el remartgà ch'el n'enconuschia betg la Svizra.
