Cura che Surses ha midà dal Rumantsch grischun en scola a l'idiom s'è Linard Candreia engaschà per il Surmiran. Quai saja in dals motiv per ses engaschi per dapli litteratura surmirana. Il scolast secundar pensiunà ha gia publitgà divers cudeschs cun diversas chasas edituras. Ussa ch'el haja dapli temp saja per el er cler da s'engaschar pli ferm per dapli litteratura surmirana. Ed uschia è Candreia stà il motor da las duas publicaziuns actualas da l'ultim temp.
Dar schlantsch a la litteratura surmirana
Scriver per l'amur da la litteratura na saja betg per in'elita, quai saja sia motivaziun. Linard Candreia vuless dar nov schlantsch a la prosa e la poesia surmirana. «Ils onns 70 ed 80 era il moviment litterar surmiran grond», ussa è la finamira da Candreia da vegnir cun novs impuls. Franc ina giada per porscher nov material litterar er a las scolas, ma er per enritgir la cultura surmirana. L'antologia «Prosa surmirana Da se cò» e la pli nova publicaziun surmirana «Tona Rasteler rachinta – Ein Rechenmacher erzählt» sajan bain publicaziuns cun texts per part gia cumparids ina giada, ma sajan er da valur istorica litterara e possian esser l'entschatta d'ina fasa creativa. Per Linard Candreia esi en mintga cas è cler – el vegn a publitgar er en il futur.
