Da Laufen en il chantun Basilea-Champagna enfin a Stierva – quai è stada la ruta da viandar l'onn passà da Linard Candreia. Sias impressiuns e ses inscunters spontans ha el mess sin palpiri ed illustrà cun bleras fotografias. Il cudeschet «Impressionen einer Fussreise» na saja nagina lavur litterara u schurnalistica, raquinta il scolast da gimnasi pensiunà e tradescha er che la publicaziun è l'emprima part d'ina trilogia.
Puspè sin viadi
Il mument è Linard Candreia sin viadi da Basilea a Genevra. Quai tenor il medem schema sco sia emprima tura: La saira turna el adina a chasa a Laufen per esser pli liber e pudair far las etappas cura ch'el vul. Il terz viadi vegn ad esser da Basilea a Chiasso. Sin ses viadi haja el remartgà ch'el n'enconuschia betg la Svizra. Ussa cun esser pensiunà, haja el temp per tals projects – el sa legria dentant era sin ina eventuala spassegiada da Basilea enfin a Paris.