Mobilitad electrica - Grischun ha gia bleras staziuns publicas da chargiar

En il Grischun datti actualmain 280 staziuns publicas da chargiar autos electrics. Quai scriva l'Uffizi chantunal da traffic ed energia sin dumonda dad RTR. Savens sajan quellas staziuns perfin en regiuns periferas, ha ditg il manader da l'uffizi Thomas Schmid. Chargiar ordaifer in auto electric na saja ozendi nagin problem. Igl haja staziuns avunda. Il martgà saja fitg dinamic, i dettia blers privats ed interpresas d'energia ch'installeschian adina puspè novas staziuns da chargiar autos. Per l'avegnir saja impurtant ch'i dettia adina dapli pussaivladads en garaschas cuminaivlas da pudair chargiar l'auto. Qua dettia il mument anc grond potenzial ha ditg Schmid. Dal chantun na datti naginas subvenziuns per installar staziuns da chargiar autos. Per part datti interpresas d'energia che subvenziuneschan l'installaziun da chargiaders, quai era per persunas privatas.

Beiva metta a disposiziun auto electric empè da far festa da giubileum

L'Ovra electrica da Beiva festivescha quest onn ses anniversari da 90 onns. Empè d’organisar ina festa, ha l’ovra electrica fittà in’auto electric per ses societaris cooperativs. Sco quai che Werner Wettstein, il president da l'ovra electrica da Beiva ha ditg, hajan ins vulì far insatge spezial. Empè dad organisar sco tar il giubileum da 75 onns ina festa, hajan ins tranter auter era pervi da corona tschertgà insatge auter, per far in plaschair a las commembras ed ils commembers da la societad cooperativa.

Per in onn ha l’ovra electrica da Beiva staziunà amez Beiva in auto electric. Quel po vegnir reservà per singulas uras, sco era per plirs dis. Ils commembers da la societad han survegnì la summa da 600 francs, ch’els pon nizzegiar per ir cun l’auto electric. Duvrar quel pon dentant era persunas che n’èn betg commembers da l’ovra electrica da Beiva. Ellas ston simplamain pajar la tariffa normala sur l'app ch’ins dovra per avrir l’auto electric.

Promover la mobilitad electrica

Sco quai che Werner Wettstein ha ditg, veglian ins uschia promover la mobilitad electrica, ed era nizzegiar meglier l’atgna forza electrica. L’um da 81 onns accentuescha, che tut l’energia che vegnia chargiada en l’auto electric, derivia per 100% ord energia d’aua, e per la pli gronda part or da l’atgna ovra electrica che vegn spisgentada en dus lieus cun l’aua da la Gelgia.