Il plaid «Farera» deriva dal pled latin «ferraria» che munta «miniera da fier» – quest num renviescha ch'il metal fier n'era betg be enconuschent durant blers tschiantaners en Val Farera, mabain che quel vegniva era minà ed elavurà là. Da quel fatg èn er vegnids pertscharts ils Englais che traversavan la Svizra en tschertga da fier per bajegiar lur vias fier. Uschia ha la Val Sassam Mines Company Ltd. cun sedia a Londra construì il 1866 la pendiculara Gruoba a Farera. Da quel temp aveva l'industria da minieras conjunctura auta en la regiun da la Viamala.
L'emprima pendiculara en il Grischun
La pendiculara Gruoba saja l'emprima pendiculara insumma en il Grischun, di Johannes Mani, il president da l'uniun minieras Rain Posteriur. La stad passada han ins pudì renovar la staziun sura per mantegnair la perditga istorica. Ed a chaschun da quella renovaziun datti uss in'exposiziun speziala en il Museum da minieras a Calantgil.
Pendiculara Gruoba
-
Bild 1 von 4. La stanza cun l'exposiziun speziala. Bildquelle: RTR.
-
Bild 2 von 4. Model da la staziun da pendicurara restaurada. Bildquelle: RTR.
-
Bild 3 von 4. Fotografias da la restaruaziun la stad passada. Bildquelle: RTR.
-
Bild 4 von 4. Visualisaziun da l'artist Samuel Singer. Bildquelle: RTR.
Exposiziun speziala avrigl fin october
En la stanza sut dal museum datti da vasair fotografias da la restauraziun, in model da la pendiculara, in film ed ina visualisaziun sco che la pendiculara avess pudì vesair ora. Quella visualisaziun ha l'artist da Pignia Samuel Singer fatg sin basa da fastiz ch'els hajan chattà en il guaud da Farera. I saja grev da dir co ch'igl haja propi vesì ora, perquai ch'i na dettia naginas fotografias u maletgs da quel temp, di Johannes Mani.
Igl è impurtant da mantagnair e mussar quai che noss perdavants han fatg.