Quels plans sajan per il mument mess sin glatsch, ha confermà il manader da project Marco Cortesi da la fatschenta MCI a Spreitenbach sin dumonda.
Contract da locaziun a partir dal schaner
Sco quai che Philipp Sigron, il substitut dal manader da l'Uffiz da migraziun e dretg civil dal Grischun ha confermà, stettia il Scalotta a disposiziun al chantun a partir da l'emprim da schaner 2025. La caracteristica da l'immobiglia saja sumeglianta als ulteriours alloschis dal chantun, uschia che l'immobiglia giaja bain a prà al concept, ha el ditg. Planisà saja d'alloschar l'entschatta 20 – 30 persunas, en il cas urgent pudess l'alloschi Scalotta tenor taxaziun actuala porscher spazi per 70 – 80 persunas.
Vischnanca infurmescha
Daniel Wasescha, il president communal da Surses ha ditg, che la suprastanza communala saja vegnida infurmada ch’il chantun Grischun vegnia a prender a fit l’immobiglia Scalotta per alloschar persunas dal sectur d’asil. La populaziun vegnia infurmada uschè spert cura ch’ins sappia dapli ha ditg Wasescha, decider en chaussa na possia la vischnanca dentant betg, cun quai ch’ella na possedia betg l’immobiglia.
