A Trimmis èn s'inscuntrads il cusseglier federal Beat Jans ed il cusseglier guvernativ Peter Peyer. En il center da transit han els discutà davart la situaziun d'asil. En Svizra èn vegnidas inoltradas passa 16'000 dumondas d'asil e Beat Jans spetga enfin la fin da l'onn anc dapli annunzias. Pervi da la situaziun internaziunala, sco p.ex. la guerra tranter la Russia e l'Ucraina, tschertgan dapli persunas protecziun. Perquai dettia dapli dumondas d'asil, di Beat Jans.
Er en il Grischun è la situaziun difficila. Tenor il cusseglier guvernativ sto il Chantun esser flexibel. Ins stoppia chattar soluziuns pragmaticas, di Peter Peyer. Pervi da guerras u conflicts stoppian ins quintar ch'il chantun Grischun stoppia porscher en il futur ad anc dapli requirents d'asil in suttetg. Ils chantuns e la confederaziun stoppian collavurar. Sch'i dettia tuttenina anc dapli dumondas d'asil, dovria soluziuns.
Ins maina in dialog tranter chantuns e confederaziun, uschia Beat Jans. I saja impurtant da tschertgar soluziuns a lunga vista per surmuntar en il futur tut las dumondas da requirents e requirentas d'asil.
