Il problem da spazzi d'abitar pajabel per indigens enconuscha er Lantsch. La statistica mussa che da las 1000 abitaziuns è sulettamain mintga quarta abitada da persunas indigenas. Dapi dal 2016 porscha la societad d'abitadi Lantsch sco cooperativa abitaziuns. Cun la chasa da pliras famiglias ha la societad fatg fitg bunas experientschas resumescha il president Donat Simeon ils ultims onns.
Ussa planisescha la societad in proxim project. La vischnanca metta a Surveglias a disposiziun il terren en dretg da construcziun. Uschia san vegnir realisadas quatter chasas cun 29 abitaziuns ni en tut 39 unitads d'abitar per passa 60 persunas. Pront ins vuless esser il 2028, uschia Simeon.
Project da 21 milliuns francs
Il project Surveglias sa laschia mo finanziar sche set abitaziuns vegnan vendidas sco emprimas abitaziuns, uschia che la societad sto finanziar 15 milliuns francs resumescha Simeon la situaziun finanziala. Insumma sajan las finanzas adina ina sfida. La societad realisescha spazzi d'abitar pajabel e betg abitaziuns da luxus. Las abitaziuns hajan uschia in bun standard, sajan betg surdimensiunadas e porschian tuttina tut quai ch'ins drova per viver ozendi.
Il 2025 vegnan fatg las lavurs da planisaziun da detagl, il 2026 duess vegnir cumenzà cun la construcziun per esser pront il 2028. Entrar en la societad d'abitadi Lantsch, nua che dat ina glista da spetga, ins sa cun cumprar in fegl da participaziun.