La radunanza communala da Lantsch ha approvà il preventiv 2024 che quinta cun in pitschen gudogn da 23'400 francs – quai tar entradas ed expensas da radund 9 milliuns francs. Plinavant èn previs investiziuns nettas da passa 5,8 milliuns francs. Ultra da quai ha la radunanza communala decis da laschar il pe da taglia sin 75% da la taglia chantunala simpla.
Ulteriuras decisiuns:
- Per la sanaziun da la via da guaud «Gôt Dafora» è vegnì approvà in credit da 62'000 francs. Il chantun surpiglia 68% dals custs da sanaziun.
- Per la nova purschida d'in bus da notg (on demand) en la regiun Lai-Alvra, sa participescha la vischnanca cun ina contribuziun annuala da 16'000 francs.
- La nova cunvegna da prestaziun cun la LMS AG è vegnida discuttada durant la radunanza communala e vegnida deliberada per mauns da la votaziuns a l'urna.
- Las occurenzas sportivas en las destinaziuns Lai vegnan sustegnids finanzialmain en l'avegnir entras in fond d'event separat. Là sa participeschan las vischnancas Churwalden, Vaz e Lantsch ed han dacurt approvà ina cunvegna. Tschertas prestaziuns van da nov era sur quest fond d'event. Uschia ch'ins stoppia adattar la cunvegna da prestaziun cun Lantsch turissem (LLT), perquai che tschertas prestaziuns ch'èn vegnidas furnidas fin ussa da la LLT vegnan finanziadas da nov sur il nov fond d'event. La contribuziun da la vischnanca per ademplir las incumbensas da LLT importa da nov 260'000 francs empè da 300'000 francs sco fin ussa.
