«Landwasserwelt» - Project turistic da 12 milliuns sa retardescha

«Perquai che la Viafier retica ha memia paucs locomotivists e locomotivistas sa retarda la Landwasserwelt», ha ditg Roman Cathomas manader da project envers la FMR. Per cumpensar la mancanza, curseschan actualmain bus da remplazzament sin la via tranter Filisur e Tavau. Uschia che la vischnanca na po actualmain betg sanar questa via, di Roman Cathomas. A la staziun da Filisur è numnadamain planisada in'attracziun cun dus vaguns cun il num Filusio e Bistro cun illusiuns opticas, infurmaziuns ed ina pitschna purschida gastronomica.

Il manader dal project è dantant optimistic, ch'ins possia celebrar tut las novas attracziuns il zercladur dal 2025 a chaschun dals dis dal patrimoni mundial.

Farrera survegn ina staziun

In dals puncts culminants saja franc il tren istoric che vegnia a cursar tranter Alvagni e Filisur cun fermada tar il viaduct da la Landwasser. La vischnanca Farrera en Val Alvra survegn oramai 122 onns suenter l’avertura da la lingia d'Alvra sia atgna «staziun», sche er pitost simbolicamain. Roman Cathomas tradescha dantant che cun la senda da viandar existenta tranter Farrera e la nova farmada survegnia la vischnanca uschia novas pussaivladads: «Forsa datti schanzas per la vischnanca da sa sviluppar economicamain cun la Landwasserwelt.» Tar la nova fermada «Farrera» quint'ins, tenor Roman Cathomas, da terminar las lavurs fin la fin d'avust, uschia ch'il «Viadukt-Shuttle» pudess cursar en in onn. A la staziun existenta ad Alvagni bogn han ins gia adattà il perrun da la staziun per il nov shuttle, quellas lavurs èn vegnidas terminadas l'atun passà.

Autras attracziuns vegnan ad esser in bain puril che po vegnir visità, in’attracziun en las plantas cun il num «Baumgleiter» - ina sort «zipline fitg patgifica» che maina da Filisur da planta tar planta aval. Plinavant duai dar in nov parcadi cun infrastructura sanitara tar l’entrada dal viaduct ed in tren electric sin via che va da la staziun da Filisur fin sut il viaduct da la Landwasser. Blera infrastructura saja gia avant maun, ha ditg Cathomas, uschia saja il museum da viafier a Bravuogn in dals magnets entaifer il project. Là vegnia construì ina viafier da model en il liber.

Grondas investiziuns

Ils 12 milliuns francs che vegnan investids, derivan da las vischnancas, da la regiun, da privats, dal chantun e da la Viafier retica. La summa che la Viafier retica investescha en il project è 4,5 milliuns francs. Il chantun Grischun sustegna il project cun 2,9 milliuns francs.

La «Landwasserwelt» è in project turistic che consista da differentas attracziuns en il conturn dal viaduct da la «Landwasser» en la Val Alvra. La fasa da lantschada cuzza dall 2024-2027 e durant quella duess il dumber da giasts venir augmentà sin 50'000 persunas ad onn. Cun in sistem da dumbrar vulan ins eruir, quanta glieud che sa mova en il resort e tge svilup ch'i possia dar.