2006
L’iniziant principal e chanzlist communal Ursin Fravi lantscha ensemen cun il president dal club da passlung Leo Baselgia ed il president communal Simon Willli l’idea per in implant da far biatlon.
2007
L'avrigl decida la radunanza communala da Lantsch in credit d’impegn da radund 5,6 milliuns francs per bajegiar l’Arena da biatlon Lai. La vischnanca surpiglia ina cumpart dad 1 milliun francs. 20% dals custs totals surpiglia il chantun Grischun.
2013
Ils 26 d’avrigl succeda l’emprima badigliada per realisar l’Arena da biatlon sur Lantsch. Ils proxims mais han ins construì tranter auter in stan da sajettar cun 30 plazs, adattà per cursas da la cuppa mundiala.
Il december han lura gì lieu las emprimas cursas da biatlon en la nov’arena.
2015
L’october sa decida la vischnanca da Lantsch per l’investider Michael Hartweg sco partenari per sviluppar vinavant l’Arena da biatlon. Quai lubescha tranter auter da realisar ils proxims onns il Nordic House.
2017
L’avust survegn l’Arena da biatlon da la IBU (Federaziun internaziunala da biatlon) la licenza per organisar concurrenzas da la cuppa mundiala e campiunadis mundials.
Mo paucs mais pli tard, il december, han lieu las emprimas cursas internaziunalas da biatlon (cuppa IBU). Per ils megliers resultats svizzers han procurà quella fin d’emna ils dus Rumantschs Eligius Tambornino sco 14avel dal sprint, ed Aita Gasparin sco 18avla dal sprint.
2020
Als campiunadis mundials dals juniors e giuvenils la fin da schaner èn sa participadas 500 atletas ed atlets. Ed ils organisaturs avevan quintà cun 5'000 aspectaturs, per surpraisa èn la finala 7'000 persunas vegnidas a las cursas a Lantsch.
2021
L’Arena da biatlon sa sviluppescha, il settember succeda l’emprima badigliada per la pista d’ir cun skis cun rodas. Quella vegn prolungada sin 4 kilometers, suenter che organisaziuns d’ambient han refusà in traject pli lung.
2022
Il matg venda l’investider Michael Hartweg l'Arena da biatlon Lai SA a Swiss Ski. Principalmain quai che pertutgia la part strategica dettia anc in grond potenzial tar l’arena, di Swiss Ski sco acziunaria principala.
2023
Cun organisar il campiunadi europeic da biatlon la fin da schaner daventa l’arena a Lantsch anc pli enconuschenta tar ils fans dal biatlon. La Svizra fa ina medaglia, Amy Baserga e Niklas Hartweg gudognan argient en la staffetta singula maschadada.
Il december 2023 datti per l’emprima giada cursas da la cuppa mundiala en l’Arena da biatlon.
2025
Sco punct culminant po l’Arena da biatlon Lai organisar il favrer il campiunadi mundial, cun ils megliers e las meglras biatletas dal mund.