-
Bild 1 von 6Legenda: La cussegliera guvernativa Barbara Janom Steiner ensemen cun la conferenza dals presidents da la Regiun Alvra. RTR, Federico Belotti -
Bild 2 von 6Legenda: Roman Cathomas è il maina project dal project "Landwasser - in monument istoric dal Grischun". RTR, Federico Belotti
-
Bild 3 von 6Legenda: Roman Cathomas da la Viafier retica declera ideas che la gruppa da project ha per commerzialisar meglier la Val d'Alvra. RTR, Federico Belotti
-
Bild 4 von 6Legenda: Qua davant il viaduct dal Landwasser pudessi dar ina plattafurma panoramica. RTR, Federico Belotti
-
Bild 5 von 6Legenda: Suenter il viadi ha Thomas Kollegger, il manader da l'uffizi da vischnancas sunà la tiba davant il viaduct dal Landwasser. RTR, Federico Belotti
-
Bild 6 von 6Legenda: En il futur duain cursar regularmain trens panoramics sur il viaduct dal Landwasser. RTR, Federico Belotti
L’idea è da far pli enconuschenta la regiun da la Val d’Alvra cun il viaduct dal Landwasser. Ils visitaders duain pudair far viadis en trens cun vaguns averts, sco era cun cumposiziuns istoricas. Ils trens cun ils vaguns averts duain cursar tranter Filisur e Surava, ils trens istorics tranter Filisur e Tain/Wiesen.
Bleras ideas
En in tren spezial da Casti a Filisur ha Roman Cathomas, il manader dal project «Viaduct dal Landwasser – monument istoric dal Grischun» declerà, tge ch’ins savess tut realisar. Pussaivel èsi era da construir plattafurmas panoramicas per lung da la lingia da tren. Dasper temas da viafier duain era giugar ina rolla principala la natira e la cuntrada. Uschia duai per lung da la viafier dar elements da divertiment, ed era animals pudessan vegnir integrads, per exempel en furma d’in parc d’animals u cun la pussaivladad da visitar in bain puril da divertiment.
Sustegn dal chantun
La presidenta da la regenza grischuna Barbara Janom Steiner ch’ha visità il tren spezial suenter ina visita da la conferenza dals presidents da la Regiun Alvra ha ditg ch’ella beneventia l’idea da promover la regiun enturn il viaduct dal Landwasser. Il mument ins na possia betg anc dir tge sustegn finanzial ch’i dettia dal chantun, ma il project preschentà saja in project che possia quintar cun il sustegn dal chantun.
Suenter il project olimpiada - ch’ha fatg naufragi - èn avant maun daners, ed il project preschentà è in project che merita il sustegn.
Custs betg anc enconuschents
Actualmain sa chatta il project en la fasa da concretisaziun, scrivan ils purtaders en ina communicaziun communabla. Il mument vegnian analisads ils custs d’investiziun e la rentabilitad. Lubientschas u cunvegnas da finanziaziun n’èn betg anc avant maun.
RR actualitad 12:00