-
Bild 1 von 4Legenda: Il viaduct da la Landwasser tranter Casti e Filisur è part da la lingia da viafier da l'Alvra. Ensemen cun la linga dal Bernina furma ella la zona principala dal patrimoni mundial da l'UNESCO da la Viafier retica. Keystone -
Bild 2 von 4Legenda: Il viaduct da spirala a Brusio è part da la lingia da viafier dal Bernina. Ils trajects da l’Alvra e dal Bernina n'èn dentant betg ils singuls patrimonis mundials da l'UNESCO en il Grischun. Keystone
-
Bild 3 von 4Legenda: La claustra Son Jon a Müstair è part dals patrimonis mundials da l'UNESCO dapi l'onn 1983. Keystone
-
Bild 4 von 4Legenda: L'arena tectonica Sardona è be parzialmain sin territori grischun e tutga, sco la lingia da l'Alvra e dal Bernina da la Viafier retica, dapi il 2008 tar il patrimoni mundial da l'UNESCO. Keystone
Ozendi attiria il viaduct da la Landwasser, ch'è part dal patrimoni mundial da l'UNESCO, per gronda part mo interessents da la viafier. Quai duaja ussa sa midar, dian ils iniziants dal project.
Inscenar e commerzialisar il viaduct
Il project duai inscenar e commerzialisar il viaduct, ch'è avert gia dapi il 1903, sco in monument caracteristic dal Grischun.
Sco ils mainaprojects communitgeschan, duai uschia vegnir stgaffida in'attracziun, che generescha dapli giasts per l'entir chantun.
Tenor Martin Vincenz, il CEO da Grischun vacanzas n'èsi dentant betg l'idea da remplazzar ils capricorns Gian e Giachen mabain da cumplettar quels. L'idea saja da stgaffir cun il viaduct ina icona per il Grischun sco la tur d'Eiffel per Paris ni il Matterhorn per il Vallais. Ils capricorns stettian per la marca Grischun ed il viaduct saja ina icona.
Lieu neutral e central
Ins avess era pudì prender tut insatge auter ch'il viaduct sco icona, uschia Martin Vincenz. I dettia numnadamain pliras pussaivladads, saja quai lura architects, festivals da cultura, flums e lais ubain las linguas. Tuttina dettia plirs arguments per il viaduct:
- il viaduct è entamez il Grischun,
- cuntanschibel da tut las destinaziuns,
- tuts san duvrar el per far reclama (betg lià u lunsch davent d'ina destinaziun)
- cun il patrimoni mundial da l'UNESCO e la Viafier retica datti gia in fundament per bajegiar si las activitads
Ch'i vegnia uschia fatg reclama be per la Viafier retica na lascha Martin Vincenz betg valair. Grischun vacanzas vegnia er vinavant a far reclama cun las destinaziuns e purschidas enconuschentas sco mountainbike, skis u viandar, uschia il directur da Grischun vacanzas.
Raps dal chantun
Il project vegn, sco part dal program da turissem 2014 – 2021, sustegnì dal chantun cun 120'000 francs. Las vischnancas da la regiun Alvra e la Viafier retica contribueschan mintgamai 60'000 francs. Igl è planisà d'avair in concept concret entaifer in onn – e fin il 2019 duai il viaduct da la Landwasser pudair sa preschentar sco attracziun turistica.
RR novitads 10:00