Curt avant mezdi è succedida la perforaziun dal nov tunnel da l’Alvra tranter Preda e Spinas. Ils miniers, inschigners e tut ils cumpigliads han celebrà quest mument istoric cun ina festa. Tar l'act festiv èn stads preschents 300 envidads e 30 represchentants da medias.
Il tunnel vegl tranter Preda e Spinas è vegnì avert avant 115 onns. Perquai ch’il tunnel na correspunda betg pli a las pretensiuns da segirtad dad oz e perquai ch’il tunnel sa chatta en ina schletta cundiziun, ha la Viafier retica decidì avant otg onns da construir in nov tunnel e da duvrar il tunnel vegl sco tunnel da segirtad. Sco il tunnel vegl, vegn era il tunnel nov ad avair ina lunghezza da circa 5.8 kilometers. 345 milliuns francs vegnan investids en il tunnel, la gronda part paja la Confederaziun, 15% surpiglia il chantun.
-
Bild 1 von 7Legenda: Il mument istoric: la rusna è tras. RTR, Federico Belotti -
Bild 2 von 7Legenda: Ils miniers giaudan il mument. Els han lavurà durant trais onns en il tunnel. RTR, Federico Belotti
-
Bild 3 von 7Legenda: Ils responsabels da la Viafier Retica. RTR, Federico Belotti
-
Bild 4 von 7Legenda: Ils responsabels èn loschs suenter la perfuraziun dal tunnel. RTR, Federico Belotti
-
Bild 5 von 7Legenda: Mardi da mezdi han ils miniers perfurà il davos toc dal tunnel. RTR, Federico Belotti
-
Bild 6 von 7Legenda: Applaus per ils miniers ch'han lavurà bun trais onns en il tunnel da l'Alvra. RTR, Federico Belotti
-
Bild 7 von 7Legenda: Cun musica èsi vegnì festivà quest di istoric. RTR, Federico Belotti
Lavurs cun in u l'auter obstachel
Era sche las lavurs èn ussa en il plan da termins, na s’enclegia quai betg da sasez ch’ins è oz uschè lunsch. La pli gronda sfida è vegnida surmuntada avant in onn, nua ch’ils miniers han gì da siglientar en ina zona problematica cun grip fragil e porus. Cun in sistem cumplitgà da schelar il grip han ils miniers surmuntà la zona privlusa cun il crap ch’ha num «Raibler Rauwacke».
Avertura en trais onns
Enfin ch’il nov tunnel da l’Alvra po avrir, vegnan anc ina giada a passar circa trais onns. Sche tut va tenor plan, avra il tunnel la fin da l’onn 2021 u l’entschatta dal 2020. Suenter l’avertura dal nov tunnel vegn alura il tunnel vegl renovà e midà en in tunnel da segirtad. Uschia èsi en il futur pli segir, da passar il tunnel da 5.8 kilometers lunghezza. Avessi per exempel ina giada dad arder, cura ch’in tren passa tras il tunnel nov, alura pon ils viagiaturs fugir sur 12 colliaziuns traversalas en il tunnel da segirtad.
RR actualitad 17:00+