30-50% dals funs sin quest mund valan sco degenerads, tendenza creschenta. Per cumbatter quest svilup emprova la scienza, dentant era purs e puras, da chattar novas metodas per lavurar cun e betg cunter la natira. «Agricultura regenerativa» è qua in'impurtanta filosofia. Per promover quest pensar datti dapi dus onns l'organisaziun «Top 50 Farmers».
Mintg'onn vegnan elegids ils 50 pli innovativs manaschis da tut Europa. Quest onn èn trais manaschis svizzers stads tranter ils top 50, tranter els era Marcel Heinrich da Filisur.
Marcel Heinrich e ses dus emprendists sa fatschentan intensivamain cun il terren che gioga ina rolla centrala en l'agricultura regenerabla. Heinrich punctuescha ch'il terren saja perscrutà mo per var 50%, quai che haja schoccà e motivà el d'emprender dapli en chaussa.
Ils umans san co ch'ins sgola sin la glina. Ma la basa da la vita, co ch'ins producescha victualias, è perscrutada mo per 50%.
Sin ses bain puril sa basa Heinrich sin in'utilisaziun multifara dal terren tant sur sco er sut terra. El cumbinescha differentas spezias da plantas per cumbatter parasits e per promover la microbiologia dal terren. Uschia semna el per exempel fava ensemen cun arveglia. L'arveglia attira il bau da fava e protegia uschia la fava sezza. Ed el agiunta cumpost per sustegnair la microbiologia.
Questas metodas mainan ad ina pli gronda biodiversitad ed ad ina productivitad. In ulteriur aspect da sia lavur è l'agroselvicultura, nua che plantas vegnan integradas en ils ers. Questas plantas gidan ad impedir l'erosiun e porschan protecziun cunter la chalira e cunter la setgira. Or dal punct da vista scientific èsi cumprovà ch'ils retgavs en vischinanza da las plantas èn per fin 30% pli auts.
Sco pur dovri surventschida da metter plantas en ils ers. Ma entant fiss jau cuntent sche nus avessan qua gia bleras retschas dapli.
Marcel Heinrich è persvadì che l'agricultura regenerativa è la dretga via per il futur. La distincziun sco in dals «Top 50 Farmers» da l'Europa al motivescha da cuntinuar questa via pretensiusa e da dumagnar las sfidas da l'avegnir. Ses bain puril «Las Sorts» a Filisur è in exempel per l'agricultura regenerativa en l'Europa.