La filosofia dal Festival «Pachamama» ch'ha gì lieu a Rona saja da s'inscuntrar plain conscienza sco umans sin quest mund, sa colliar cun la natira ed in cun l'auter, di Olivia Marie dal comité d'organisaziun. Ed uschia er dar vinavant insatge bun per la proxima generaziun.
In festival propi persistent
La persistenza ed il quità da la natira èn visibels dapertut: Nagin entra en ina zona che n'è betg dada libra per il festival, mintga singul ha cun el si'atgna vaschella per il da mangiar dals differents stans d'alimentaziun ed ils toi tois da chemia èn remplazzads cun las tualettas da cumpost, ils uschenumnads compotois. Persistenza totala, perfin ils excrements vegnan reciclads. Sin l'entir areal da set hectaras n'è betg in sulet toc rument u in stumbel da cigarettas giu per terra.
En il temp dad oz sentia ella adina pli e pli fitg che la glieud haja il desideri d'inscunters reals, da sa colliar ed esser en la natira, di Olivia Marie. Perquai supponia ella ch'uschè blera glieud haja gì interess da vegnir al Festival «Pachamama». Ils bigliets sajan numnadamain spert stads vendids ora.
L’occurrenza sa drizza er a famiglias, uschia ch’ils organisaturs dal festival han gia oravant quintà cun in grond dumber d’uffants. Sin il program stattan concerts, lavuratoris, ateliers da saut, meditaziun, yoga, rituals, referats ed anc bler dapli. Igl ha dà passa 12 concerts ed il dumber d'autras occurrenzas è tar passa 60 activitads da tut gener.
Celebrar la «mamma natira»
Tranter auter hai er dà in referat dals dus guardiaselvaschina Gian Andri Dosch ed Andreas Mumenthaler. Er Werner Erb – il sunatibas che stat a Rona – è stà al lieu, uschia che mintgin ha dastgà empruvar da sunar la tiba. Sin il program stat er ina guida d’ervas cun Arturo Fasciati da Beiva ch’enconuscha prest mintga erva. Il scopo principal dal festival è ch’ils visitaders e las visitadras celebreschan l'entschatta tar la «mamma natira», la «Pachamama». Sin l’entir areal dal festival n'è vegnì vendì nagin alcohol cunquai ch'er bleras famiglias èn stads da la partida.
