«I n’è betg da sutstimar», ha Gion-Reto Paterlini ditg areguard l’iniziativa communala per abolir il parlament da la vischnanca da Vaz/Obervaz. Per che quella reusseschia, dovri numnadamain 200 suttascripziuns valaivlas e quai tar be radund 1'790 persunas cun dretg da votar. Perquai saja l’iniziativa bain in crap da stgarpitsch, declera il cuniniziant e manader da la Paterlini Bau SA:
Probablamain èsi pli grev da reussir cun l’iniziativa che tar la votaziun.
Tuttina quinta Gion-Reto Paterlini ch’i saja pussaivel da rimnar cun dus, trais gidanters las suttascripziuns necessarias fin il termin ils 23 da fanadur 2025.
«Il turissem funcziuna, la vischnanca betg»
Sco che Gion-Reto Paterlini ha explitgà, è il parlament communal per el gia daditg in tema. I dettia numnadamain a Lai differents projects che spetgian dapi onns sin lur realisaziun: «Per exempel la renovaziun da la plazza da sport, davart la quala nus avain gia votà u ina chasa da parcar amez il vitg.»
Il parlament è in frain. Ins na vegn simplamain betg vinavant.
Che tut giaja memia plaun mussia surtut in auter project, declera Gion-Reto Paterlini: «Dapi pli u main dudesch onns è in nov center d’attempads e da tgira en planisaziun. E tuttina n’essan nus anc nagliur.» Schegea che betg tut na giaja schlet a Vaz/Obervaz, stoppia el oramai guardar cun in egl scuidus sur ils cunfins: «Il turissem funcziuna, la vischnanca betg. E perquai ans surpassan noss vischins da Lantsch e Churwalden. Igl èn pitschnas vischnancas cun structuras simplas.»
L’onn passà ha dà l’impuls
Ch’il parlament communal è daventà in tema en la vischnanca saja era la consequenza d’ina votaziun da la stad passada, di il cuniniziant: «Ils 30 da zercladur 2024 avain votà davart l’introducziun d’ina direcziun communala. Quai avess anc cumplitgà e franà pli fitg l’organisaziun communala.»
Sco ch’ins po leger en il protocol da questa votaziun, han radund 69% ditg Na – quai vul dir 489 persunas tar ina participaziun da radund 40%. Tenor Gion-Reto Paterlini ha quest resultat mussà che la populaziun da Vaz/Obervaz na vul betg cumplitgar l’organisaziun communala, anzi: «Igl è stà in cler Na e perquai vulain ussa simplifitgar la structura. In parlament communal n’è betg pli adattà.»
Memia baud per prender posiziun
Sin dumonda da la FMR n’ha la vischnanca da Vaz/Obervaz – quai vul dir il president communal Maurin Malär – betg prendì posiziun. Els n’hajan anc betg tractà l’iniziativa. I saja memia baud per s’exprimer e pussaivel ch’els spetgian il termin e cunquai il resultat da l’iniziativa.
