Gist trais giadas han las 24 chantaduras e chantadurs cun il dirigent Christian Klucker dastgà prender encunter il premi per l’emprim plaz. L’ensemble dal Grischun «Incantanti» ha gudagnà en las categorias: Chors giuvenils maschadads, Musica sacrala a capella ed il premi principal ch’è dotà cun 1’500 francs.
Per il mument muntan questas victorias fitg bler. Ellas mussan che nus essan sin l’endretga via.
Per 19 da 24 chantaduras e chantadurs ina premiera
Per las bleras chantaduras e chantadurs è la concurrenza a Lucca en l'Italia stada la premiera sin palc internaziunal. Uschia n'aveva il dirigent era betg quintà cun in tal success. En quella furmaziun chantia l'ensemble pir dapi in onn.
Che nus avain schon uss gì uschè in grond success fa anc dapli plaschair.
Ils proxims gronds festivals spetgan gia sin «Incantanti». Il matg è il Festival da chors giuvenils svizzer a Winterthur ed il november lura la proxima concurrenza internaziunala a Lissabon en il Portugal.