Sco quai che Seraina Schuler, l’ustiera da l'hotel Alvra & Gelgia a Casti ha ditg envers RTR, dependian els fermamain da la fermada dals trens d’express. Radund 95% da lur giasts fetschian in viadi cun ils trens d’express. Perquai fa l’ustiera ussa propaganda sin las raits socialas, d’intervegnir. Fin ils 23 da zercladur po numnadamain in e mintgin inoltrar giavischs per il nov urari tar il chantun.
Vischnanca fa opposiziun
Ad intervegnir vegn era la vischnanca d'Albula/Alvra. Sco quai che Daniel Albertin, il president communal ha ditg, saja la fermada dals trens d’express fitg impurtanta. I vegnian numnadamain blers giasts da Casti, sco era da la val Surses e giu da Lai e conturn.
Urari pli stabil
La Viafier retica argumentescha cun la stabilitad da l’urari. Sco quai che Renato Fasciati, il directur da la Viafier retica ha ditg envers RTR, saja la stabilitad da l’urari sin la lingia da l’Alvra betg fitg buna. Cun betg pli laschar fermar ils trens d’express, daventia l’urari pli stabil. Plinavant daventian ils trens da Cuira fin San Murezzan set minutas pli sperts a partir da l'urari nov. E Fasciati menziunescha, che tut ils trens directs sa fermian vinavant. I sa tractia mo dals trens d’express. In problem saja era la veglia staziun da Casti. Cruschar trens cuzzia pli ditg che sin staziuns pli modernas nua ch’i dettia in sutpassadi. Fasciati di però, che uscheprest che la staziun da Casti saja renovada, pudessian ils trens d’express puspè sa fermar a Casti – ina garanzia na dettia però betg. Actualmain vegnan elavurads plans per renovar la staziun da Casti. Sche tut va tenor plan duess la nova staziun esser pronta l’onn 2029.
