Grischun Central - Parc Ela vul bajegiar in center da visitaders

Sco lieu è previs il conturn dal bajetg da la posta, u sco segunda varianta ost tar ils parcadis da la staziun. Dieter Müller il directur dal parc ha ditg, ins haja pudì crear duas novas plazzas ed ina terza plazza temporara saja vegnida transfurmada en ina plazza fixa. Quai dovria plaz. Ed era il siemi d’in center da visitaders cun post d’infurmaziun e lieu d’entaup, daventia ussa pli concret. A la radunanza generala dal Parc Ela, il prim d’avrigl, vegnan ils commembers dumandads, sch’els vulan liquidar 600’000 francs agen chapital per il project Tgesa Parc Ela. Enfin tar quest termin vul il Parc Ela era avair la resposta da las vischnancas dal parc, co ch’ellas prevesan da sustegnair il project.

Cumprar u affittar

Il parc Ela ha elavurà duas variantas per construir il center. Sch’il bajetg vegn affittà è da quintar cun in'investiziun da circa 1,1 milliuns francs e custs da manaschi annuals da radund 190’000 francs. Ina cumpra dal bajetg vegn budgetada cun 1,7 milliuns francs. Sche tut va tenor plan, vul l’uniun Parc Ela realisar il project gia en il decurs da l’auter onn. Il mez dal 2022 scada il contract da locaziun en la staziun da la Viafier retica.

Albula/Alvra ha anc decidì nagut

Actualmain è era la vischnanca Albula/Alvra vi da ponderar l’avegnir da sia administraziun communala. Quella è il mument situada en il bajetg dasper la baselgia amez il vitg. Sco quai che Daniel Albertin il president communal ha ditg, sajan ins il mument vid examinar tge pussaivladads ch’i dess da far in’administraziun communala a la staziun da Casti. In’autra ponderaziun ch’ins fetschia saja da sanar energeticamain il lieu existent da l’administraziun. Ils plans dal Parc Ela na tangheschian betg ils plans da la vischnanca, ha Daniel Albertin plinavant ditg.

RTR novitads 17:00