La Viafier retica sto dar scleriment daco ch'ella ha siglientà il viaduct vegl da Castiel tranter Cuira ed Arosa. Quai pretendia l'Uffizi federal da traffic (BAV). Tenor lez è la siglientada controllada che la Retica ha fatg ils 14 da matg da quest onn ina midada dal project e quai avess l'uffizi stuì approvar en il rom da la procedura d'approvaziun dal plan. Perquai sa tracti d'ina siglientada illegala declera il BAV envers RTR.
Confus è che la retica aveva explizit vuglì scriver en la lubientscha, che il BAV ha dat per la destrucziun dal viaduct, da betg siglientar il viaduct ord motivs d'ambient, tranter auter pervi dal flum sut il viaduct. La lubientscha ha la Viafier retica survegni uschia.
La Viafier retica accentuescha ch'els hajan midà idea suenter che la lubientscha era sin maisa. Silsuenter hajan ins tematisà e coordinà la metoda da siglentar il viaduct vegl da Castiel cun duas autoritads chantunalas. D'ina vart cun l'uffizi da chatscha e pestga e da tschella cun l'uffizi da construcziun bassa. Tuts dus uffizis hajan era dà glisch verda per la siglientada controllada. Da la vart dal chantun n'è quai enfin qua dentant anc betg vegnì confirmà. La Viafier retica saja uss vida far in rapport tge consequenzas che la siglientada haja gì per l'ambient. Quest rapport vul la retica dar vinavant a l'Uffizi federal da traffic.
Sch'ins construeschia u deconstrueschia in implant da viafier vulì in permiss dal BAV. Mo la lubientscha dal chantun na tanschia betg. Tge consequenzas che quest rapport pudess avair n'è anc betg cler.
Cas è tar procura publica grischuna
Il cas è uss tar la procura publica grischuna. Quella è vi da far in'examinaziun preliminara. A maun dals resultats da quest’examinaziun decida la procura publica lura sch'i dat in'inquisiziun penala.
Or da l'archiv:
