La radunanza communala da la vischnanca Albula/Alvra ha approvà in credit brut da 40 milliuns francs per construir in tunnel da drenascha a Brinzauls. La decisiun è crudada unanimamain cun 69:0 vuschs. La vischnanca quinta cun sustegn da chantun, Confederaziun e dad auters, uschia che la vischnanca quinta da stuair pajar sezza radund dus milliuns francs.
Las emprimas lavurs duessan cumenzar quest atun, a partir dal mars da l’auter onn duess vegnir cumenzà cun siglientar. La construcziun dal tunnel cuzza radund trais onns. Il tunnel da drenascha nov vegn ad esser passa 1,6 kilometers lung. Quel prolunghescha il tunnel existent ch‘è passa 600 meters lung. Or dal tunnel nov vegnan fatgas dapli che 100 perfuraziuns da drenascha.
Ils geologs speran cun questa mesira, da pudair franar ils ferms moviments da la bova da Brinzauls. Actualmain sa mova il vitg sezs cun 1,15 meters ad onn.
