Il glindesdi ha cumenzà la construcziun dal tunnel da drenascha a Brinzauls. Il tunnel da sondagi dad actualmain 635 meters vegn prolungà sin dus kilometers. Cun il tunnel duai l'aua pudair svanir ed uschia quietar la bova. Quai scrivan las autoritads communalas. Il 2027 duain las lavurs cun passa 100 perfuradas esser terminadas.
Nossa finamira è dad evitar plirs donns tras la ruschnada a Brinzauls e ch'ins po en l'avegnir puspè construir novas chasas. Il vitg duai er anc exister en 100 onns.
Actualmain ruschna il vitg per radund dus meters ad onn. Entras quai vegnan chasas, lingias e vias donnegiadas. I dat in scumond da bajegiar. Per annular quel, stoppian ins franar la ruschnada dal vitg sin 10 centimeters ad onn, ha ditg il manader dal project Josef Kurath, inschigner da l'uffizi da construcziun bassa dal Grischun. Las experientschas or dal tunnel da sondagi construì il 2021 fin 2022 mussian ch'il tunnel haja in effect fitg positiv sin la ruschnada, ha el aschuntà.
En tut custa quest tunnel da sondagi e drenascha 40 milliuns francs. Ils custs vegnan repartids sin il chantun e la Confederaziun (90%). Ils ulteriurs 10% vegnan repartids sin la vischnanca d'Alvra ed ils possessurs dad infrastructura pertutgads. Latiers tutgan la lingia d'Alvra da la viafier retica, differentas vias chantunalas ed in conduct da current ferm internaziunal.
La regenza grischuna beneventa la construcziun d’in tunnel da drenascha a Brinzauls. Quel duess frenar ils ferms moviments dal vitg. Tenor il chantun ins haja pero nagina garanzia ch’il tunnel da drenascha funcziuni era sco giavischà. Perquai lavuria il chantun il mument vi d’in plan B.
Sin dumonda dad RTR, sch'i dettia la pussaivladad che l'entir vitg stoppia vegnir rumì, ha ella ditg:
Quella pussaivladad n'è betg dad exclauder, perquai che nus n'avain oz nagina garanzia da 100% ch'il tunnel da drenascha funcziunescha, dentant savain nus che quai è actualmain cun il stan da savida dad oz la megliera pussaivladad cun il pli grond success.
