Actualmain ruschna la vischnanca da Brinzauls cun ina spertezza da 1,9 meters per onn, quai saja in aut stan, sco il president communal da la vischnanca Albula/Alvra, Daniel Albertin di. Er la spunda sur la vischnanca sa mova cun ina spertezza considerabla da fin 9 meters per onn. La segirtad a Brinzauls saja oz dentant meglra ch'avant in onn. La gallaria da sondagi haja purtà resultats positivs. Las lavurs per la gallaria da drenascha cumenzan proxim’emna e duessan esser terminadas la fin dal 2027. La speranza: ch'ins riva da franar il moviment a Brinzauls cun agid da la drenascha fin sut 10 centimeters ad onn.
stan 19-04-2024
(meters per onn / trend dals davos dus mais)
- Plateau: 4,2 m / creschind
- Front: fin a 5,7 m / creschind
- Vest: 8,8 m / creschind
- Insla ost: 4,3 m / creschind
- Fil Caltgeras: 2,9 m / creschind
- Sbuvada Vitg: 1,9 m / creschind
L'intschertezza resta
La bova ed il moviment vegnan vinavant survegliads intensivamain. Schebain che la segirtad per ils da Brinzauls è garantida fa la situaziun actuala quitads al president communal Daniel Albertin. Ins haja bain in bun project ch'ins possia cumenzar proximamain, dentant saja la natira actualmain fitg, fitg sperta.
Jau hai la speranza che nus hajan avunda temp per la drenascha, betg che la natira saja pli sperta che nus cun il project.
Per ils da Brinzauls resta l'intschertezza sco ina dunna ha ditg suenter la saira d'infurmaziun. Ella guardia cun sentiments maschadads vers l'avegnir.
I n'è betg «a fin» perquai che la crappa è vegnida giu avant in onn. Brinzauls sa mova vinavant. L'intschertezza resta e nus na savain betg tge ch'è en in dus u trais onns.
