Sco quai che Roman Sommer, il president dal cussegl d’administraziun dal museum da viafier ha ditg, custia il project 1,1 milliuns francs. Radund 600'000 francs hajan ins gia rimnà, e dal project «Landwasserwelt» dettia quai radund 250'000 francs. Ussa manchian anc 250'000 francs. Quels veglian ins finanziar cun agid da privats, fundaziuns e daners dal maun public.
Puncts culminants da la Viafier retica en il model
Vegnir construida duai ina viafier da model cun cuntrada. Ils trens dal tip Lehmann-Gross-Bahn LGB (mesira 1:22,5) duessan circular sur viaducts sco quel dal Landwasser, quel da Solas u da Tagn/Wiesen. Era la viafier dal Bernina e quella d’Arosa duain vegnir realisadas. En funcziun duess la viafier vegnir durant ils mais da stad ed atun. Realisà duess tut vegnir gist visavi dal museum existent. Construida duess la cuntrada da la viafier da model vegnir da voluntaris cun experientscha da la Germania e da la Svizra. Radund 20 persunas hajan gia ditg da vulair gidar a construir la viafier da model, ha ditg Roman Sommer. Construì duess vegnir en trais etappas. L’intent saja da gia pudair laschar cursar in emprim tren il zercladur da l’onn che vegn, cura ch’il project «Landwasserwelt» duess ir en vigur.
