Istorgias en il bogn Andeer na saja betg in teater classic cun aspectaturas vis à vis, di il raquintader Erwin Dirnberger. Ins po far bogn – e sco intermezzo pon ins inscuntrar persunas che avran ina pitschna fanestra en il mund da lur temp. Ils aspectaturs e las aspectaturas ch’èn ils giasts dal bogn, èn envidads da giudair l'aua chauda e tadlar e far lur patratgs. Quai durant quatter sairas en il bogn da cura ad Andeer.
La passiun dad Erwin Dirnberger che viva ad Andeer èn l'istorgia e la cultura, e quai tut sin iniziativa privata. Far viver l'istorgia da passa 200 onns dal bogn – ed er l'istorgia da la famiglia Fravi ch'aveva da lezzas uras inizià tut. L'istorgia è denturn durant ch'ins po giudair l'aua termala. Quai la saira cun glisch da chandailas ed atmosfera speziala.
Per mai dovra quai adina ina persuna, ina rolla che raquinta da ses temp e da sia vita.
Per quella saira sa transfurma Erwin Dirnberger en la rolla da trais differentas persunas. In nobel che vegn per ina cura ad Andeer, ed in pur indigen vegn a pled. E la terza persuna filosofescha davart il far bogn, e pertge che quella cultura reviva adina puspè. E quai dal temp dals Romans fin oz. Ni teater ni eveniment cultural classic – simplamain per mintgin e mintgina che ha mustgas da giudair l'aua chauda e tadlar. Duas uras per mitschar dal mintgadi, e forsa en il vair senn dal pled sfundrar en in auter mund.
