Il Museum retic preschenta en sia nov'exposiziun fotografias e rauba che stattan en connex cun l'istorgia da far bogn en il Grischun. Ils bogns da cura han en il 19avel tschientaner gì ina grond'impurtanza per il turissem. Da quel temp n'eran curas però anc betg sco ins enconuscha ellas oz. Enfin 10 uras er'ins en l'aua. Fin che la pel stgarpava. Quai era lura il segn che la cura funcziuna.
Quellas curas n'eran nagin giudiment.
Suenter ch'ins aveva dapli savida medicinala – èn era las curas sa midadas, e n'eran betg pli uschè diras. Cun il temp han ins era construì pli bellas chasas da cura, nua che la glieud aveva era in giudiment sper las curas da l'aua. La purschida era pli gronda cun pussaivladads da far sport, ir a spass u era visitar concerts e teaters.
Plinavant ha il Museum retic era exponats che raquintan da l'impurtanza da l'igienia a vista medicinala. Bogneras u era emprims biglins, da quests temps cura ch'ins ha per l'emprima giada installà bogns en abitaziuns cun aua currenta.
Dasper las funtaunas d'aua minerala e l'istorgia dals emprims bogns, vegn en in terz pass era tematisà il sport da nudar. Nua van ins en il Grischun a far bogn? Co emprend'ins oz da nudar, e co han ins emprendì pli baud da nudar? Tut quai pon ins emprender en la nov'exposiziun speziala dal Museum retic. Era la moda da far bogn dals ultims decennis è exponida.
L'exposiziun speziala porscha dentant anc dapli – i dat vitiers differentas occurrenzas. Per exempel il di da famiglia nua ch'ins po far sez sal da bogn – quel ha lieu ils 25 d'avust. Ed in referat sur da l'aua da baiver cun ina someliera d'aua – ha lieu ils 20 d'avust.
Or da l'archiv: