Senza naiv pon ins lavurar pli effizient
La raschun pertge che las lavurs cumenzan gia ussa è simpla: i va pli tgunsch avant che l'arena vegn ennavada. Tenor Silvio Baselgia dal comité d'organisaziun ch'è responsabel per la part sportiva possian ins uschia lavurar pli effizient. Lai ha gia organisà cursas sin fitg aut nivel, il campiunadi mundial saja dentant la Champions league. Perquai saja il squitsch franc dà. La fin finala stoppia tut esser perfect ed ir, i na dastgia dar nagins sbagls.
Nus essan sa preparads uss 10 onns sin quest mument – nus essan pronts.
Sa chapescha dovri naiv per il biatlon – quai saja il punct central. Senza naiv na datti naginas occurrenzas. Ins haja trais pussaivladads che dettian perquai ina tscherta segirtad: Il «Snowfarming», nua ch'ins metta sur la stad da la vart in bot naiv, la «Snowfactory» nua ch'ins po preparar naiv independentamain da las temperaturas ed ils indrizs da far naiv artifiziala.
Fin uss hajan quels trais puncts gidà d’avair la segirtad ch'ins possia la finala avair las meglras cundiziuns per las occurrenzas. Anc na saja el betg gnervus, di Silvo Baselgia ch'è gia stà da la partida d'inquala occurrenza pli gronda. Actualmain na realiseschan ins anc betg quant grond che quest mument saja. Ch’ils campiunadis mundials da biatlon sajan il 2025 a Lantsch saja in'istorgia extraordinaria. Ussa as saja a quel punct ch'ins haja adina vulì esser cun l'arena da biatlon.
Il biatlon è sa sviluppà fermamain
Fin il 2006 è Mario Denoth – che viva a Ramosch – sez stà activ en il sport da biatlon. Sco uffant e giuvenil ha el fatg passlung. La fin da ses temp tar ils juniors è el sa decidì per il biatlon e pli tard è el schizunt daventà trenader da biatlon. Entant lavura l'um da 44 onns sco selvicultur. Oz è Mario Denoth manader da Giuventetgna e sport e promova uffants davent dad otg onns en il sport da biatlon.
Cun in pè sun jau adina restà tar il sport da biatlon.
Ils ultims onns saja il sport da biatlon en il Grischun sa svilupà fermamain cunquai ch'ins haja ussa duas fitg bunas infrastructuras: ina a Lantsch ed ina a Sclamischot. Uschia hajan ins las meglras premissas per trenar. Sch'i dat ina infrastructura adattada, dettia quai schlantsch ad ina disziplina sportiva.
La novitad ch'ils campiunadis mundials da biatlon han lieu il 2025 en il Grischun sco era las bunas prestaziuns da la squadra nazuiunala dals ultims onns hajan era dà in stausch a la popularitad dal biatlon. Ma malgrà da quai nov schlantsch ch'il biatlon haja survegnì ils ultims onns, dettia tenor Mario Denoth tuttina potenzial da promover anc dapli quella disciplina.
Ursin Fravi – in dals motors dal biatlon a Lantsch
Ursin Fravi (63) ch’è stà blers onns chanzlist da Lantsch, ha adina promovì il sport da biatlon a Lantsch. Entschet haja tut l’onn 2006, cura che Lantsch haja per l’emprima giada pudì manar tras il campiunadi Svizzer da biatlon. Da lez temp era Fravi manader dad JO en il club da cursa lunga Bual, ed el haja gugent gidà. Cler haja era da critichers di Fravi, ma credits a la radunanza communala en connex cun il biatlon, sajan adina stads positivs. «L’emprima finamira era d'acquistar la licenza B da la Federaziun internaziunala per differentas concurrenzas en serias pli bassas», explitgescha Fravi.
In’auter punct culminant saja stà il Tour de Ski da passlung, ch’haja mess Lantsch en in grond focus da la publicitad. Quai saja stà in pass decisiv, ed ins haja pudì preschentar l’infrastructura e la regiun ad in vast public da televisiun.
In grond gudogn per il biatlon a Lantsch saja stà l’interprendider Michael Hartweg ch’haja investì en il biatlon a Lantsch. Grazia ad el saja stà pussaivel da construir il Nordic House, che saja stà impurtant per survegnir la licenza A per il biatlon, ha ditg Fravi.
Dapi trais onns è l’arena da Biatlon a Lantsch en possess da la federaziun da skis Swiss Ski. Fravi ha ditg, ch’el spera ch’era sut la batgetta da Swiss Ski, possian vegnir manadas tras mintg’onn cursas da biatlon sin aut nivel.
