In cot selvadi daventa mascottin da l'Arena da biatlon a Lai. Ils proxims dus onns vegnan ils fans dal biatlon a vesair «Lenzi» tar ils eveniments gronds ch'èn planisads. Gia dals 25 fin ils 29 da schaner spetga l'emprim eveniment – il campiunadi europeic da biatlon. Il december 2023 datti lura las emprimas cursas da la cuppa mundiala ed il 2025 stat sin il program il punct culminant, il campiunadi mundial da biatlon.
Il messadi ch'il mascottin porta è ch'ins duai prender resguard in sin l'auter e da betg viver mintgin en ses agen mund.
Tschernì il cot selvadi han ins tranter auter er perquai che precis quest animal ha chaschunà grondas discussiuns avant in onn e mez. Lura han ins vulì engrondir la via per skis cun rodas atras ils spazi da viver dal cot selvadi. Il mascottin «Lenzi» simboliseschia il cumpromiss tranter occurrenzas da sport grondas e la protecziun da la natira, ha ditg il mainafatschenta dal campiunadi mundial da biatlon a Lai Jürg Capol envers il schurnal regiunal da SRF. Il mascottin duai far attent sin la natira e persistenza.
