Battaria «XXL» a Cunter - Arcunar energia per stabilisar la rait

Ensemen cun collegas ha il electroinschigner Fabio Luzio fundà ina societad acziunara per pudair finanziar ed installar ils trais containers cun la battaria. Ussa stattan ils trais containers cun la battaria sin l'areal d'industria a Cunter. La prestaziun: 4 uras megawatt – quai correspunda a l'energia da 4'000 battarias dad auto. Grev d’imaginar, Fabio Luzio ha dentant quintà or che la battaria en furma «XXL» pudess proveder electricitad per l'entira Val Surses per in'ura e mez. Tals indriz n'han dentant betg la funcziun da furnir electricitad per il Surses sch'i vess da vegnir stgir. Il sistem è qua per furnir electricitad a la rait cura ch'i fa da basegns – pia per stabilisar l'entir sistem.

Il dovra constanza

En Svizra vegn tut manischà da la Swissgrid, lezza è responsabla ch'i vegn furnì adina tanta electricitad sco ch'il vegn duvrà. Quai sto esser en l’equiliber per che la frequenza da l’electricitad resti constanta tar 50 Hz, uschiglio pudessi dar in blackout. Sch'igl ha memia pauca electricitad ston per exempel las ovras idraulicas u eba ina battaria furnir energia. Sch'igl ha memia blera energia vegn la battaria chargiada. Ils davos onns ha la Swissgrid dad intervegnir adina dapli per stabilisar il sistem.

Tenor Fabio Luzi dessan quellas battarias vegnir installadas en mintga vischnanca, pir lura fissan tals sistems effectivs per stabilisar la rait d'electricitad. E cler, arcunar energia ed alura dar al sistem cura ch'ella vegn duvrada è ina fatschenta. Sch'i renda propi saja dentant anc in zic baud per dir.  Avant che far gudogn èsi l'emprim da cuvrir las investiziuns – perquai ch'in tal sistem custa tant sco ina flotta chasa.