«Gastro-Elite» - Tschintg cuschinunzs giuvens sa preparan per ina concurrenza

A las 10:00 uras la damaun s’inscuntran Mark, Timo, Gaudenz, Kevin e Jorick en ina cuschina da GastroGrischun. Ils tschintg giuvens fan il giarsunadi da cuschinunz ed èn il segund onn. Oz datti bler da far. Els han oz per l’emprima giada da cuschinar sco team, e quai per 70 persunas durant la concurrenza «Gastro-Elite». Perquai na perdan els betg bler temp e sa mettan cun vestgadira da lavur e chapitschas alvas vi da la lavur.

La cuschina ch’era avant curt anc netta e quieta survegn vita. Cuppas, tests, cuntels, planettas e stadairas vegnan sin maisa, mintgin sa metta vid sia incumbensa. In dad els taglia verdura sin ina planetta, l’auter prepara la charn per il gulasch. I vegn mess sin la platta l’aua per la schuppa e preparà la pasta per ils Brownies ch’i dat sco desert. Els fan lur lavur a moda fitg concentrada e n’han betg bler temp da discurrer.

Sper ils tschintg cuschinunz èn er ils dus coachs, Manuel Zünd e Ricardo Wolf, da la partida. Els èn qua per sustegnair ils emprendists e per dar buns cussegls nua ch'i dovra.

Cun egls attents van ils coachs atras la cuschina e guardan als giuvens sur la spatla. Igl è ina flotta atmosfera en cuschina, i vegn discutà sur da quantitads d’ingredienzas, fatg sgnoccas e gidà in l’auter. Pass per pass vesan ins sco ch’i dat ord las ingredienzas ina schuppa, in gulasch ed in bun dessert. En tut la cuschina savura da tschagulas e panzetta brassada. Er ord il furnin vegn l’odur da Brownies anc chauds.

Impressiuns dal di da trenament

Suenter ina pausa da mezdi vai vinavant – i dat anc bler da far, numnadamain degustar e finir las tratgas. La cuschina sto vegnir nettegiada e tut sto vegnir pachetà en. La tschaina vegn numnadamain servida en in auter lieu. Cun auto portan ils tschintg cuschinunz e lur coachs tut lur rauba tar la Scola professiunala artisanala a Cuira.

I va vers saira, plaunet vegni serius. L’ultima sfida è dad avair pront las tratgas al dretg mument e da preschentar ellas bel sin in plat. A las 18:00 uras arrivan ils emprims giasts per l’aperitiv. Envidà èn magisters, patruns ed autra glieud, en total 70 persunas. Fertant ch’ils giasts fan patgific crescha la tensiun en cuschina. Uss sto tut ir spert, ils cuschinunz vegnan in zic en il stress, ma quai na badan ils giasts betg. Suenter dus plats suonda il dessert: in brownie cun glatsch da vaniglia e cumpot da maila.

Impressiuns da la saira