Var 150 persunas èn sa radunadas per la radunanza da delegada da l'uniun da hotellaria e gastronomia. In dals temas che fatschenta la branscha fermamain è il persunal qualifitgà che manca. Là stoppian per exempel er ils manaders e manadras da fatschentas turisticas vegnir scoladas e sensibilisadas. «Quai è cleramain in tema da direcziun», uschia il president da Gastro Grischun, Franz Sepp Caluori.
Recrutar persunas giuvnas
Ina pitga per recrutar avunda persunal qualifitgà, dentant era motivà ed innovativ, è er da motivar l'uschenumnada «Gen Z» u la «Gen Alpha» – pia persunas a partir da las annadas 1995. La branscha da gastronomia e turissem duai vegnir relevanta per quella generaziun. In punct relevant saja là la lavur en teams, flexibilitad ubain novs models da temp da lavur.
Per pudair cuntanscher la generaziun pli giuvna, stoppian ins dentant er cuntanscher ella, per exempel er via medias socialas. Plinavant vai per far pli flexibel ils process. Tschentar dumondas via WhatsApp enstagl mail ubain laschar far annunzias per ina plazza via video possian esser emprims pass.
Per laschar vegnir a pled la generaziun giuvna è l'onn passà il «NextGen Tourism Board» vegnì stgaffì. In project nua che giuvens e giuvnas ord las branschas gastronomia, hotellaria e turissem s'engaschan per far pli attractiv las branschas en il futur e prender a mauns las sfidas e basegns da la generaziun giuvna.
Intelligenza artifiziala
Ulteriur potenzial per la branscha vesa Franz Sepp Caluori, il president da Gastro Grischun, en l'intelligenza artifiziala. Quella porschia schanzas per augmentar la producziun e per far pli attractiv las plazzas da lavur. Ultra da quai po quella era gidar da distgargiar lavur ed uschia esser in sustegn per dar dumogn a la mancanza da persunal. Er per ils osps dettia qua pussaivladas da far pli agreabel lur experientscha.
