I vegn ad esser l'occurrenza sportiva la pli gronda en il Grischun l'onn 2026. Dals 5 da zercladur fin ils 5 da fanadur 2026 vegnan spetgads var 36’000 participantas e participants sco er 100'000 visitadras e visitaders a Cuira ed en il chantun Grischun. Quai ha il comité d’organisaziun da la 59avla Festa federala da tir annunzià a chaschun da sia terza conferenza da medias. Era davart il stadi actual da las preparativas è vegnì infurmà.
Sur in entir mais ora vegn glieud or da l’entira Svizra a Cuira ed en la regiun. Uschia na profitescha betg be la citad, mabain quasi l’entir Grischun da la Festa da federala da tir.
Sin il Rossboden a Cuira, la plazza da tir principala, vegn sajettà mintga di auter che la mesemna. Sin tschellas 19 plazzas da tir ordaifer vegn per regla sajettà il venderdi, la sonda e la dumengia. Las plazzas da tir externas sa chattan maximalmain 45 minutas davent da Cuira, quai ch’ils organisaturs taxan sco optimal areguard il traffic.
Il center da festa dal ESF2026 vegn ad esser en la «nova halla d'events» ch'è situada circa 250 meters al nordvest dal implant da tir Rossboden. L’emprima badigliada vegn fatga proximamain. Tras la decentralisaziun da l’occurrenza e cun ina realisaziun persistenta na ston vegnir construids nagins edifizis temporars.
Nus essan preparads fitg bain, nus avain la permissiun da bajegiar e l'emprima badigliada vegn fatga il december. Jau sun da fitg buna speranza che nus vegnin ad esser a fin ad uras. Nus essan dentant sin viadi senza reservas e stuain dar gas.
Per la 59avla Festa da tir federala èn vegnì budgetads radund 14 milliuns francs. Var 8 milliuns da quels custs vegnan cuvrids, sche participants e participantas pajan lur stetgs. Ils ulteriurs custs vegnan generads sur sponsurs e partenaris.
