Or da la chasa da scola a Ramosch prevesa la vischnanca da Valsot da fabritgar set abitaziuns per indigens, abitaziuns da 3 e 4,5 stanzas, oravant tut per famiglias.
Scrit ora ina concurrenza
Set architects èn vegnids envidads, da quels èn tschintg sa participads. Finalmain ha il project Caruso dal architect da Guarda Urs Padrun gudagnà. Tenor il president communal Victor Peer ha quel fatg la cursa oravant tut causa ch’el ha mantegnì fitg ferm l’apparientscha externa.
Bleras chasas da la vischnanca èn fabritgadas en stil talian. La chasa da scola duess era retschaiver quel aspect talian, uschia il president communal.
Cun la realisaziun da quest project ha la vischnanca in ulteriur project che duess promover l’attractivitad da la vischnanca. La vischnanca da Valsot ha gia realisà in'ustaria or da la chasa da scola a Tschlin, plinavant fabritgà ina butia sin plazza da scola a Ramosch.
Nus stuain en prima lingia guardar per nus sezs.
Sco proxim vegn il project da la chasa da scola a Ramosch suttamess a la radunanza communala e sche quella dat glisch verda prevesan ins da cumenzar cun las lavurs durant l'onn proxim.
