Butia Ramosch – la communabla
La Butia Ramosch è naschida or da la miseria. Cura che l’anteriura stizun ha serrà è ina gruppa d’indigens e secundindigens sa fatschentada cun la dumonda: Co salvar la stizun dal vitg?
Lur soluziun: Els fundeschan la societad Butia Ramosch, la basa per ina nova stizun. Cun pajar 200 francs ad onn sustegnan ils 130 commembers e commembras la Butia, raps per il tschains da las localitads.
Che la nova stizun ha insumma pudì vegnir realisada è il merit da la populaziun da la vischnanca Valsot.
A la radunanza communala ha la populaziun da Valsot decis unanimamain da dar 1 milliun per ina nova stizun.
Mardi e gievgia offrescha la mainafatschenta da la Butia Wanda Hopman gentar. Ina offerta che vegn schazegiada dals luvrers da la regiun, da turists e regularmain dad Antonetta Bischoff, ch'ha 97 onns.
Venderdi saira è il café Plazzin avert enfin mesanotg. Cunzunt la Musica Ramosch giauda quai. Il café Plazzin è daventà il lieu da cumpagnia suenter lur emprovas.
La Stizun a Vignogn – la digitala
Il 2021 ha il Volg da Vignogn serrà sias portas. La ViVal (societad cooperativa da las stizuns Volg Vella/Morissen e Pasternaria Lumnezia) surprenda la stizun e realisescha in nov model: La Stizun – ina stizun digitala cun products regiunals e biologics.
Ils products regiunals schazegian cunzunt ils turists ed ils osps da segundas abitaziuns.
Blers esters fan cumpliments per la bella stizun, els èn cuntents ch’i dat ella.
Ils abitants da Vignogn n’han betg tuts plaschair da La Stizun. Els crititgeschan ch’ils products sajan memia chars ed il sortiment na adattà als giavischs e basegns dals indigens. Il mainafatschenta Gianfranco Soller enconuscha la critica ed empermetta remedura.
En l'avegnir lain nus dar al client la pussaivladad da cumparegliar ils products. Nus augmentain la schelta dals products convenziunals e nus tschentain els – ensemen cun ils products regiunals – gia a l’entrada da la stizun.
La svieuta actuala da La Stizun correspunda pli u main alla svieuta dil Volg d’antruras. Cunquai che La Stizun ha dentant strusch custs da persunal, vegn ella da surviver.
La stizun da Surrein – la convenziunala
Per pudair servir als basegns e giavischs da la clientella avra la stizun da Surrein sias portas gia a las 6.45.
Per ils luvrers è quai flot ch’els pon vegnir la damaun marvegl, saja quai per cigarettas u in paunin per la pausa.
Ina stizun dal vitg è bler dapli che mo in lieu per cumprar la rauba dal mintgadi. En ils pitschens vitgs èn la stizun savens il davos lieu da sentupada. Da quai èn era ils abitants e las abitantas da Surrein pertscherts, blers sustegnan lur stizun cun far qua tut lur cumissiuns.
Per surviver sto ina stizun dal vitg far ina sviueta segir pli che mez milliun francs. A Surrein è quai il cas. Dapi che la stizun da Rabius ha serrà sias portas è la svieuta perfin creschida. Ma a lunga vesta èsi da far quint cun damain svieuta perquai che la populaziun va en digren. Per l’avegnir è ina model hibrid en discussiun. Avantmezdi avert normal cun persunal, suentermezdi e vers la saira d’entrar digital.
Sustegn per stizuns dal vitg
En il chantun Grischun ha practicamain mintga stizun dil vitg gia gì sustegn dal Agid svizzer per la muntogna. A Surrein hai dà raps per rugalar la stizun, a Vignogn per la mobiglia e per crear la plattafurma digitala dals products regiunals e la Butia Ramosch ha survegnì raps per la cassa e las mobiglias.
L’Agid svizzer per la muntogna sustegn stizuns dal vitg dapi 2005. Avant era il sustegn collià ferm cun il puresser.
